Á annað hundrað lífrænir neytendur á stofnfundi

Vel á annað hundrað manns sóttu stofnfund Samtaka lífrænna neytenda í Norræna húsinu í gærkveldi. Undibúningur að stofnun samtakanna hefur staðið yfir í nokkra mánuði en mikill áhugi vaknaði á stofnun formlegra samtaka eftir að óformleg samtök lífrænna neytenda fengu góðar undirtektir á Facebook.

Oddný Anna Björnsdóttir, hvatamaður að stofnun samtakanna flutti inngangsorð þar sem hún gerði grein fyrir ástæðum þess að samtök af þessu tagi væru nauðsynleg og lýsti markmiðum samtakanna sem eru að; efla miðlun upplýsingar um lífrænar afurðir og framleiðslu þeirra, hvetja til aukinnar neyslu á vottuðum lífrænum vörum, vekja athygli á kostum lífrænna aðferða, vekja athygli á nauðsyn bættrar meðferðar búfjár, veita markaðinum aðhald um bættar merkingar og aukið framboð lífrænna afurða og stuðla að heilbrigðum lífsstíl og heilnæmu umhverfi.

Hamingjuóskir frá ráðherra

Gunnfríður Elín Hreiðarsdóttir, aðstoðarmaður Jóns Bjarnasonar sjávarútvegs- og landbúnaðarráðherra, var ein þeirra sem ávarpaði fundinn og sagði hún frá því að ráðherra hafi um langa hríð verið mikill áhugamaður um lífræna ræktun og óskaði hún fundarmönnum, fyrir hönd ráðherra, til hamingju með stofnun samtakanna og óskaði góðs þeim gengis í framtíðinni.

Fundarmönnum gafst síðan kostur á að skrá sig í í starfshópa og kynna sér, prófa og smakka lífræna framleiðslu og fá upplýsingar um lífrænar landbúnað og framleiðsluaðferðir í fordyri Norræna hússins þar sem sett hafði verið upp kynningarmiðstöð og kynningarstandar hinna ýmsu bænda, framleiðenda og innflytjenda.

Hundrað skráningar í tíu starfshópa

Geysigóð þátttaka var í starfshópana þar sem yfir hundrað skráningar voru í tíu hópa. Starfshóparnir munu taka strax til starfa og þeir sem skráðu sig í framkvæmdanefnd munu halda utan um hópavinnuna og gera tillögur að sameiginlegum verkefnum hreyfingarinnar.

Á nýrri heimasíðu Samtaka lífrænna neytenda, lifræn.is, mun innan tíðar vera hægt að fá nánari upplýsingar.

Styðja þingsályktunartillögur

Í lok fundar var lögð fram tillaga að fyrstu stuðningsyfirlýsingu samtakanna en hún er við tvær þingsálykturnartillögur sem nú liggja fyrir Alþingi: Þingsályktunartillaga um mótun framleiðslustefnu í lífrænum landbúnaði og þingsályktunartillaga um útiræktun erfðabreyttra lífvera.

Yfirlýsingin var samþykkt samhljóða.

Sjá nánari upplýsingar um fundinn á vef Náttúrunnar.