Handhafar forsetavalds fengu fimm milljónir

Kostnaður við ferðalög forsetahjónanna til útlanda á síðasta ári voru tæpar tíu milljónir króna, en forsetinn var þá samanlagt í um tvo mánuði í útlöndum í embættiserindum. Handhafar forsetavalds fengu greiddar rúmar fimm milljónir vegna fjarveru forsetans í fyrra.

Forsetaembættið hefur svarað fyrirspurn frá fréttastofunni um ferðalög forseta Íslands og eiginkonu hans til útlanda árin 2009 og 2010 og kostnað vegna þeirra. Í svörum embættisins kemur fram að Ólafur Ragnar Grímsson var með 53 ferðadaga árið 2009, þar af voru 43 dagar í embættiserindum en 10 dagar í einkaerindum. Tekið er fram að af þessum 53 dögum séu 18 brottfarar- og heimkomudagar. Dorrit Moussaieff forsetafrú var 25 daga í útlöndum í embættiserindum.

Kostnaður vegna þessara embættisferða; fargjöld forseta, gisting dagpeningar og annar ferðakostnaður var 3,8 milljónir króna og vegna fargjalda forsetafrúarinnar 575 þúsund og annar ferðakostnaður 23 þúsund en hún þiggur ekki dagpeninga. Heildar ferðaksotnaður forsetahjónanna árið 2009 var því 4,3 milljónir.

Samkvæmt úttekt Fréttablaðsins fá handhafar forsetavalds; forsætisráðherra, forseti Alþingis og forseti Hæstaréttar, hver um sig 20 þúsund krónur á dag þegar forseti er í útlöndum. samtals tæpar 3,2 milljónir árið 2009, rúm milljón á mann.

Forsetinn ferðaðist öllu meira í fyrra. Þá voru ferðadagar vegna utanlandsferða 86, eða tæpir þrír mánuðir, þar af 62 dagar, eða um tveir mánuðir í embættiserindum. Þar af 24 brottfarar- og heimkomudagar. Ferðakostnaður vegna forsetans var 6,9 milljónir króna, kostnaður við fargjöld forsetafrúarinnar var 2,5 milljónir og annar ferðakostnaður vegna hennar 347 þúsund krónur. Eins og áður þáði hún enga dagpeninga og hefur reyndar aldrei gert samkvæmt svari forsetaembættisins. Heildarferðakostnaður forsetahjónanna árið 2010 var því 9,7 milljónir, rúmlega helmingi meiri en árið á undan.

Greiðslur til handhafa forsetavalds vegna utanferða forseta árið 2010 voru samtals tæpar 5,2 milljónir króna.