Gagnrýnir RÚV fyrir einhliða fréttaflutning af níumenningunum

„Stuðningsmenn nímenninganna svokölluðu og þau sjálf hafa nánast notað RÚV sem einkamiðil sinn," skrifar Karl M. Kristjánsson, starfsmannastjóri Alþingis, í Fréttablaðið í dag þar sem hann gagnrýnir fréttaflutning RÚV af máli Níumenninganna harðlega.

Karl gerir umfjöllun Kastljós um málið í maí á síðasta ári að umtalsefni og gagnrýnir þáttinn fyrir að sýna „aðeins valdar rúmlega 30 sekúndur" úr myndbandi frá atburðinum sem var 2:47 á lengd.

Svo skrifar Karl: „Hvers vegna sýndi RÚV ekki myndbandið í heild? Ekki hefur skort tíma í umfjöllun um þetta mál hjá ríkisfjölmiðlunum. Allt jafnvægi hvarf úr umræðunni frá þessum degi. Búið var að hanna atburðarás og flestir héldu að hér kæmi sannleikurinn fram. Enda sýnt í sjálfu ríkissjónvarpinu."

Karl segir svo í lok greinarinnar: „Helst mátti skilja á ýmsum málsmetandi aðilum að þingverðirnir ættu að biðjast afsökunar á því að hafa látið berja sig. Þeir eiga fáa vini í þessu máli. Enginn hefur nefnt opinberlega að þau eigi afsökunarbeiðni skilið þrátt fyrir dóminn. Hins vegar verða þau ítrekað að þola svívirðingar og jafnvel morðhótanir fyrir það eitt að vinna fyrir Alþingi."

Þess má geta að í réttarhöldunum yfir níumenningunum kom fram að upptakan hefði í raun verið lengri upphaflega. Starfsmaður Alþingis virðist, af sjálfsdáðum, hafa tekið 4 mínútur úr öryggismyndavélum, og lagt fyrir forsætisnefnd en aðrar upptökur, sem hefðu getað varpað ljósi á atburðina, eru horfnar.

Hinsvegar er hægt að horfa á myndbandið, það er að segja þær mínútur sem Karl talar um, í heild sinni hér í viðhengi

Allir hinir ákærður voru sýknaðir af árás á Alþingi. Grein Karls má lesa í heild sinni með því að smella á hlekkinn hér fyrir neðan.