Kastljós mótmælir starfsmannastjóra Alþingis - Yfirlýsing

Ritstjóri Kastljóss, Sigmar Guðmundsson, hefur sent frá sér yfirlýsingu vegna aðsendrar greinar starfsmannastjóra Alþingis, Karls M. Kristjánssonar, sem birtist í Fréttablaðinu í dag. Karl gagnrýnir fréttaflutning RÚV af máli nímenninganna svölölluðu og tekur sérstaklega til umfjöllun Kastljóss.

„Í umfjöllun Kastljóss var haft samband við skrifstofustjóra þingsins og settan saksóknara í því skyni að fá þeirra álit á því sem fyrir augu bar í myndbandinu og efni ákæranna. Þau kusu að tjá sig ekki. Gífuryrði starfsmannastjórans um að Kastljós hafi sett myndbandið fram á villandi hátt eða leynt mikilvægum pörtum þess, eiga sér hvorki stoð í raunveruleikanum né ákæruatriðum málsins," segir í yfirlýsingunni.

Hana má hér lesa í heild sinni:

„Í Fréttablaðinu í dag birtist makalaus grein eftir starfsmannastjóra Alþingis, Karl M. Kristjánsson. Vegna rangfærslna og aðdróttana í garð Kastljóss er nauðsynlegt að bregðast við. Karl fullyrðir í grein sinni að í umfjöllun Kastljóss þann 20. maí í fyrra, um mál níumenninganna sem ákærðir voru fyrir árás á Alþingi, hafi verið búið að fjarlægja þá kafla upptökunnar sem sýndu best hvernig ráðist var skipulega og með hörku á starfsmenn Alþingis. Þetta er alrangt. Kastljós sýndi öll þau myndbrot sem snúa beint að ákæruliðunum. Bæði árásina á þingvörðinn og þegar honum var haldið frá útidyrahurðinni þegar fólkið fór inn í húsið. Kastljós sýndi auk þess myndband úr eftirlitsmyndavélinni sem sýnir hóp fólks ganga í átt að þinghúsinu, áður en farið var inn í húsið.

Myndskeiðin sem Kastljós sýndi voru mun lengri. Umfjöllun Kastljóss og upptökuna í heild sinni má finna á Youtube.

Megin umfjöllunarefni Kastljóss voru ákærur setts saksóknara í málinu. Kastljós hafði undir höndum nákvæmlega sama myndefni og sýnt var við réttarhöldin. Við réttarhöldin kom fram að Alþingi hafði aðeins lagt fram hluta af því myndefni sem til var, afganginum var eytt af starfsmanni þingsins. Það er því ljóst að ef eitthvað skortir upp á samhengi málsins, líkt og Karl fullyrðir í grein sinni, þá skrifast sú handvömm á Alþingi en ekki Kastljós.

Myndbandsupptakan sem lögð var fyrir héraðsdóm fylgir hér með.

Umfjöllun Kastljóss má finna hér "