Árshátíðarmyndbandi Icelandair líkt við Twilight Zone

Forsvarsmenn erlendu ferðasíðunnar Gadling misskilja heldur betur nýtt myndband sem gert var fyrir árshátíð Icelandair og halda að þar sé um að ræða kynningu á nýjum búningum flugfélagsins.

Yfirskrift umfjöllunarinnar á Gadling er „Iceland Air introduces new crew uniforms - in the weirdest airline video ever" sem á íslensku útleggst sem „Icelandair kynnir nýja einkennisbúninga í furðulegasta flugmyndbandi fyrr og síðar."

„Ég viðurkenni að ég er ekki nógu góður í íslensku til að hafa hugmynd um hvað þau eru að tala um. Þessi skemmtilega blanda af dansandi flugáhafnarmeðlimum og evrópskri tónlist kemur samt vel út," segir á Gadling.

Myndbandið sem þeir birta á síðunni sinni er gert fyrir árshátíðina sem haldin verður 19. mars og er aðgengilegt á YouTube.

„Getið þið ímyndað ykkur að United Airlines eða Delta gerði svona skemmtilegt myndband?" er spurt á Gadling. Þeim finnst myndbandið þó heldur furðulegt og ganga svo langt að líkja því við Twilight Zone-flugmyndbanda.

Smellið á tengilinn hér að ofan til að sjá myndbandið með eigin augum.