Þrír fréttamenn hjá 365 tilnefndir

Þrír fréttamenn hjá 365 miðlum eru tilnefndir til Blaðamannaverðlauna 2010, en tilnefningarnar voru opinberaðar á miðnætti.

Annars vegar er um að ræða blaðamennina Stíg Helgason og Trausta Hafliðason, hjá Fréttablaðinu, sem fá tilnefningu í flokknum Rannsóknarblaðamennska ársins 2010 fyrir greinargóða og upplýsandi umfjöllun um málefni meðferðarheimilisins Árbótar. Í rökstuðningi segir að umfjöllunin hafi varpað nýju ljósi á umdeild vinnubrögð í stjórnmálum og stjórnsýslu.

Hins vegar fær Þorbjörn Þórðarson, fréttamaður á Stöð 2, tilnefningu í flokknum Rannsóknarblaðamennska ársins 2010 fyrir skilmerkilegan fréttaflutning af viðskipta- og fjármálum. Í rökstuðningi segir að fréttaflutningurinn hafi iðulega svipt hulunni af framvindu meintra efnahagsbrotamála í aðdraganda og ekki síður eftir hrunið.