Síðustu tvær vikur fengsælar

Eftir frekar dræma laxveiði framan af sumri virðist sem að veiðin sé að taka við sér. Útlit er fyrir að veiðin í Norðurá í Borgarfirði verði svipuð og í fyrra.

Síðustu tvær vikurnar hafa veiðst 30-40 laxar í Norðurá á degi hverjum en veitt er á 15 stangir. Jón G. Baldvinsson er staðarhaldari. „Áin er núna komin í svona 1130 laxa, öll áin. Það er svona að mér sýnist að þetta verði svipað veiðiár eins og á síðasta ári, en þá veiddum við um 2300 laxa.“

Enn sem komið er er Norðurá aflahæsta laxáin. „Eftir því sem mér sýnist á tölunum þá er hæsta talan hér og það er bara náttúrulega gleðilegt fyrir okkur. Það er búið að ganga mjög vel hér og en þá gengur mikið af laxi í ána. Það er stöðug ganga.“

Jón segir að það eina sem vanti núna sé meira vatn. „Það hefur ekkert rignt sem heitið getur í minnsta kosti mánuð. Þannig að það mætti nú alveg fara að koma einhver dropi úr lofti og mér sýnist á veðurspá að það gæti orðið eitthvað um helgina.

Jón segist sannfærður um að laxveiði á landinu verði svipuð og í fyrra þó veiðin hafi verið seinna á ferðinni. Í Norðurá gekk laxinn hálfum mánuði síðar en venja er. „Ég held að þessir kuldar sem voru framan af sumri hafi áhrif á allt lífríkið að þetta sé nú örlítið seinna en þetta er vant að vera.“