Ólafur er þokkalega sáttur eftir fjögur ár sem landsliðsþjálfari

Ólafur Jóhannesson stýrir íslenska landsliðinu í fótbolta í síðasta sinn í kvöld þegar liðið sækir Portúgal heim í undankeppni Evrópumótsins. Í viðtali við Guðmund Benediktsson íþróttafréttamann Stöðvar 2 segir Ólafur að hann sé ágætlega sáttur við þau fjögur ár sem hann hefur verið í starfinu en vissulega hafi komið upp erfiðir tímar í þessu starfi.

Það er komið að síðasta landsleiknum hjá þér í bili a.m.k. Þetta byrjaði fyrir fjórum árum á Parken þar sem við töpuðum. Hvernig lítur þetta út fyrir þér gegn Portúgölum?

„Það lítur bara ljómandi vel út. Auðviðta hafa verið mörg forföll í okkar hóp. Þeir sem eru hér eru tilbúnir að gefa allt í leikinn. Ég vill meina það. Við erum að fara spila við frábært lið. Eitt besta fótboltalið í heiminum. Þeir eru frábærir þegar þeir hafa boltann en þeir eru kannski ekkert sérstakir þegar þeir hafa ekki boltann. Þeim finnst leiðinlegt að verjast og gera það illa. Við stílum inn á það að spila stífan varnarleik, sterkan varnarleik. Og þegar möguleikar bjóðast þá vitum við hvert við getum sent boltann og komist aðeins ofar á völlinn."

Ólafur segir ennfremur að undirbúningur liðsins hafi raskast aðeins þar sem að það vanti leikmenn á borð við Eið Smára Guðjohnsen og Kolbein Sigþórsson. „Undirbúningur liðsins hefur ekki raskast mikið en það verða kannski leikmenn í stöðum sem þeir hafa ekki leikið oft áður."

Guðmundur Benediktsson íþróttafréttamaður Stöðvar 2 sport spurði Ólaf hvort hann væri ánægður með þann tíma sem hann hefur verið í starfi landsliðsþjálfara.

„Ég er þokkalega ánægður með þetta. Ég vill nú helst ekki ræða þennan tíma fyrr en ég er búinn með mína leiki. Það getu vel verið að ég geri það. Heilt yfir er ég ágætlega sáttur," sagði Ólafur en hann hefur verið orðaður við Hauka í Hafnarfirði en hann vildi ekki tjá sig um þau mál að svo stöddu.