Lyklakippa Steingríms þyngist í dag

Steingrímur J. Sigfússon formaður VG verður í aðalhlutverki í dag þegar lyklaskipti fara fram í ráðuneytunum eftir ráðherrakapalinn sem lagður er formlega á Ríkisráðsfundi nú fyrir hádegið. Venju samkvæmt afhenda fráfarandi ráðherrar nýjum ráðherrum lykla sína að ráðuneytunum en í þetta sinn er ekki hægt að gera það á sama tíma allstaðar, þar sem Steingrímur kemur að öllum lyklaskiptunum.

Hann byrjar í fjármálaráðuneytinu klukkan hálftólf þar sem hann hefur verið með lyklavöldin síðustu ár. Oddný G. Harðardóttir mun taka við lyklunum úr hendi Steingríms og léttist þá kippa hans.

Það er þó aðeins tímabundið því kortér fyrir tólf mun Steingrímur skunda upp í efnahags- og viðskiptaráðuneyti og taka við lyklum úr hendi Árna Páls Árnasonar sem er að kveðja ríkisstjórnina. Og á hádegi þarf Steingrímur síðan að vera mættur í sjávarútvegs- og landbúnaðarráðuneytið þar sem enn bætist í kippuna hans þegar Jón Bjarnason afhendir honum lyklana að þeim ráðuneytum.