Dalglish lykillinn að því að halda Gerrard og Torres

"Ef hetja eins og Kenny Dalslish er við stjórnvöldin er auðveldara fyrir Liverpool að halda stjörnunum Steven Gerrard og Fernando Torres." Þetta segir Peter Beardsley.

Liverpool er að leita að nýjum stjóra og er Dalglish einna helst nefndur sem arftaki Rafael Benítez, ásamt Roy Hodgson.

Dalglish hefur fengið mikinn stuðning frá fyrrum leikmönnum félagsins og er Bearsley sá síðasti til að bætast í þann hóp.

"Ég er ekki að segja að hann muni slá strax í gegn af því það eru mikil vandræði innan herbúða Liverpool," bætti Beardsley við.

"Ég spilaði í fjögur ár fyrir Kenny og hann vann deildina tvisvar og FA bikarinn líka," segir Bearsley en meira að segja Benítez styður Dalglish.

"Ég held að hann væri besti maðurinn í starfið," sagði Benítez við Guardian.