Dæmdur fyrir að hóta manni sem kærði líkamsárás

Hæstiréttur dæmdi í dag karlmann í átta mánaða fangelsi fyrir að hafa viðhaft hótanir í garð manns og tíu ára gamallar dóttur í því skyni að fá manninn til að draga til baka kæru vegna líkamsárásar sem hafði leitt til þess að sakamál var höfðað gegn manninum.

Í skýrslu sem faðirinn gaf hjá lögreglu sagði hann að maðurinn hefði tvívegis hringt á heimili sitt. Í annað skiptið hafi hann hótað dóttur hans því í símann að hún myndi sjá föður sinn alblóðugan ef hún léti hann ekki fá símann

Við ákvörðun refsingar Hæstaréttar var litið til þess að brotið tengdist tilraun til þess að hafa áhrif á skýrslugjöf fyrir dómi í sakamáli og um væri að ræða mikilvæga opinbera hagsmuni.

Héraðsdómur Austurlands dæmdi manninn í sex mánaða fangelsi í júní síðastliðnum en maðurinn áfrýjaði dómnum til Hæstaréttar og krafðist sýknu en til vara mildunar refsingar. Niðurstaðan varð hins vegar sú að Hæstiréttur þyngdi dóminn um tvo mánuði.