Enn skelfur jörð undir Eyjafjallajökli

Enn skelfur undir Eyjafjallajökli og hafa síðustu klukkutíma orðið á bilinu 20 til 30 jarðskjálftar á klukkustund, að sögn Steinunnar Jakobsdóttur jarðeðlisfræðings á Veðurstofu Íslands. Hún segir að enginn skjálftanna hafi náð stærðinni tveir á Richter.

Steinunn segir að frá því klukkan tæplega tíu í morgun til að verða hálf fjögur í dag hafi verið minna um skjálfta á svæðinu miðað við undanfarna daga. Í morgun mældust tveir skjálftar stærri en þrír á Richter.

Almannavarnir ákváðu í hádeginu virkja viðbragðsáætlun á fyrsta háskastigi, svokölluðu óvissustigi,sem einkennist af atburðarás sem er hafin og ætla má að geti leitt til þess að öryggi fólks og/eða byggðar sé stefnt í hættu.