Vissi um fjölskyldutengslin áður en ákæra var gefin út

Ríkissaksóknari, Valtýr Sigurðsson, vissi um fjölskyldutengsl sín við þingvörðinn sem lagði fram bótakröfu í máli gegn níumenningum sem ruddust inn á Alþingi, áður en ákæran var gefin út.

Hann segir að það hafi verið dómgreindarbrest af sinni hálfu að hafa ekki áttað sig á að þau tengsl gerðu hann vanhæfan í málinu.

Hið meinta afbrot átti sér stað í desember árið 2008. Þingvörðurinn er hálf systir eiginkonu Valtýs.

Daginn eftir að ákæran var þingfest í Héraðsdómi Reykjavíkur í síðustu viku ákvað Valtýr að draga ákæruna til baka vegna vanhæfis.

Ástæðan var sú að hann hafi ekki vitað hversu mikinn þátt þingvörðurinn átti í málinu fyrr en eftir að málið var þingfest. Það var saksóknari hjá embættinu sem fór með málið og undirritaði ákæruna.

„Ég ber ábyrgðina og mér hreinlega yfirsást þetta og það er miður," sagði Valtýr í viðtali við Vísi fyrr í dag en hann kennir miklum önnum hjá embættinu um að hann hafi ekki áttað sig á vanhæfinu fyrr.