Arsene Wenger: Ekki gott fyrir hjartað mitt

Arsene Wenger, stjóri Arsenal, vonast til að dramatískur sigur liðsins á Hull í gær gefi hans mönnum trúna á það að þeir geti unnið enska meistaratitilinn í vor.

Arsenal-liðin tókst ekki að brjóta niður vörn Hull fyrr en í uppbótartíma þótt að Hull væri manni færri allan seinni hálfleik. Daninn Nicklas Bendtner skoraði sigurmarkið á 92. mínútu leiksins.

„Þetta var ekki gott fyrir hjartað mitt en þetta var ekki slæmt fyrir titilbaráttuna," sagði Arsene Wenger um sigurinn á Hull.

„Við eigum átta leiki eftir og af hverju ættum við ekki að hafa trú á því að við getum unnið titilinn," sagði Wenger.

„Við gáfum allt í þennan leik. Við náðum ekki að spila okkar besta leik en við héldum áfram allan tímann. Við þurfum öll stigin þrjú og við fengum þau eftir 90 mínútur," sagði Wenger en eftir leikinn er Arsenal með jafnmörg stig en slakari markatölu en topplið Chelsea.