Lífið

Top Gear-gæjarnir komnir til landsins

Jeremy Clarkson og James May við Arctic Trucks-Toyotuna á Norðurpólnum.
Jeremy Clarkson og James May við Arctic Trucks-Toyotuna á Norðurpólnum.
Nú rétt í þessu sást til tökuliðs breska bílaþáttarins Top Gear á leiðinni að eldgosinu á Fimmvörðuhálsi. Mikil leynd er yfir ferð föruneytsins þar sem framleiðendur vilja ekki að efni næstu þátta fréttist.

Þáttastjórnandinn James May er þarna fremstur í flokki en honum til halds og trausts eru starfsmenn íslenska jeppafyrirtækisins Arctic Trucks. May keyrir að eldstöðvunum á Toyota Hilux-jeppanum sem Arctic Trucks breyttu fyrir Top Gear þegar þátturinn hélt í frækna för á Norðurpólinn fyrir þremur árum síðan.

Búast má við að Íslandsferðin verði sýnd í næstu þáttaröð Top Gear, þeirri fimmtándu í röðinni, sem fer í loftið í sumar. Eldgosið nær þannig augum fjölda áhorfenda um heim allan en framleiðendur þáttanna segja um 350 milljónir manna fylgjast með þeim.




Tengdar fréttir

Top Gear í tíu tíma að komast að eldstöðvunum

Kvikmyndatökulið breska sjónvarpsþáttarins Top Gear frá BBC var tíu klukkustundir í nótt að brjótast yfir Mýrdalsjökul að gosstöðvunum í kolbrjáluðu veðri. Þegar þangað var komið í morgunsárið birti til og nú kvikmyndar hópurinn eldgosið í allri sinni dýrð í sól og blíðu í fylgd Haraldar Sigurðssonar eldfjallafræðings.

Kviknaði í dekkjum Top Gear-jeppa á hrauninu

Lögreglan á Hvolsvelli er mjög óhress með framferði manna, sem reyndu í gær að aka jeppa ofan á nýja hrauninu. Jarðvísindamaður býst við að þetta geti orðið spaugilegt sjónvarpsefni. Eftir því sem næst verður komist var um ræða leiðangursmenn Top Gear sjónvarpsþáttarins hjá BBC en þeir fóru upp að gosstöðvunum í fyrradag á sex jeppum á vegum Arctic Trucks og tveimur snjóbílum. Sveinn Rúnarsson, yfirlögregluþjónn á Hvolsvelli, lítur þetta alvarlegum augum og segir að engin leyfi hafi verið gefin fyrir því að aka á hrauninu. Slíkt sé bannað og skipti engu máli hver eigi í hlut. Magnús Tumi Guðmundsson jarðeðlisfræðingur varð vitni að því þegar Top Gear-leiðangurinn reyndi að komast upp á hraunið og segir hann það hafa verið spaugilegt. Það hafi gengið ósköp illa, en þeir hafi þó ekki þorað að moka úr barðinu til að komast betur upp á heitt hraunið. Bjóst Magnús Tumi við að þetta yrði skemmtilegt sjónvarpsefni. Samkvæmt Ríkisútvarpinu kviknaði í tveimur dekkjum á jeppanum þegar upp á hraunið var komið og sneru þeir jeppamenn þá við.



Mest lesið


Fleiri fréttir

Sjá meira


×

Mest lesið


Tarot dagsins

Dragðu spil og sjáðu hvaða spádóm það geymir.