Vilja stagbrú yfir Ölfusána

Ný veglína Suðurlandsvegar og tvær útfærslur brúarstæðis yfir Ölfusá er nú í umhverfismati. Vegurinn verður færður norður fyrir Selfoss og ný brú byggð yfir Ölfusá. Tvær leiðir yfir ána eru í skoðun og tvær mismunandi tegundir af brúm.

Bæjaryfirvöld í Árborg vilja að byggð verð stagbrú með stólpa í Efri-Laugardælaeyju. Vegagerðin hefur haldið fram bogabrú norðan við eyjuna, en þar má byggja hana í einum boga yfir ána. Það er ódýrasti kosturinn.

Ragnheiður Hergeirsdóttir bæjarstjóri segir að nýjustu mælingar gefi til kynna að ekki sé svo mikill verðmunur á kostunum tveimur. Hún vonast til þess að Vegagerðin fallist á sjónarmið bæjaryfirvalda, enda hafi brú þar verið á skipulagi um langa hríð; bæði hjá Árborg og eins hjá Flóahreppi.

„Bæjarstjórn Árborgar hefur alveg skýra afstöðu og við viljum sjá brúarstæðið yfir eyjuna. Þar viljum við sjá stagbrú,“ segir Ragnheiður. „Við höfum gert ráð fyrir þessu brúarstæði í áratugi. Þar sem hinn kosturinn er teiknaður er útivistarsvæðið okkar, ræktaður skógur og sögu- og náttúruminjar. Við teljum það of dýru verði keypt að fórna því.“

Vegagerðin hefur sett fram hugmyndir um fjóra kosti, stag- eða bogabrú yfir Efri-Laugardælaeyju og stag- eða bogabrú norðan við eyna. Brú þar yrði í landi Laugardæla. Til eru hugmyndir um íbúðabyggð þar, en óljóst er hvað af þeim verður.

Óvíst er hvenær af framkvæmdunum verður, en þær eru hvorki á vegaáætlun fyrir árið 2011 né 2012. Ragnheiður segir mikilvægt að fara sem fyrst í þær, enda sé um mikið öryggismál að ræða. Hún segist ekki óttast minni viðskipti í bænum við það að vegurinn færist út fyrir hann.

„Gamla brúin verður áfram og sinnir þeirri umferð sem á erindi í bæinn. Öll þungaumferðin fer fram hjá, en hún getur fælt frá. Þá má búast við aukinni umferð eftir að höfnin opnar í Bakkafjöru.“

kolbeinn@frettabladid.is