Ríkisstyrkur fór víst í einkavæddar námsbrautir

Ríkisendurskoðun hefur sent frá sér yfirlýsingu vegna ummæla Hjálmars Árnasonar, framkvæmdastjóra Keilis ehf. Þar kemur meðal annars fram að Keilir hafi víst nýtt opinbert fé í aðrar námsbrautir en þær sem ríkið styrkti. Meðal þess sem féð fór í var flugnám skólans sem er algjörlega einkavætt.

Í yfirlýsingu Ríkisendurskoðanda segir meðal annars orðrétt:

„Á árunum 2008 og 2009 gerðu menntamálaráðuneyti, Háskóli Íslands og Keilir samninga um 235,6 m.kr. framlag ríkisins til frumgreinakennslu Keilis þessi ár. Af þeim verður ekki annað ráðið en að féð hafi eingöngu átt að renna til frumgreinakennslunnar.

Athugun Ríkisendurskoðunar leiddi hins vegar í ljós að Keilir nýtti hluta þess í aðra starfsemi skólans og staðfesti framkvæmdastjóri Keilis það í bréfi til stofnunarinnar 16. ágúst 2010. Þar segir m.a. að hluti þess hafi verið notaður „í almennt starf skólans, þ.m.t. aðrar náms­brautir viðurkenndar. Má þar nefna ÍAK einkaþjálfara, frumkvöðlanám, orku­skóla, bók­legt atvinnuflug, flugumferðarstjórn, flugfreyjur, auk Háskólabrúar".

Að mati Ríkisendurskoðunar felur þetta í sér skýlaust brot á fyrrnefndum samningum og hefur ráðuneytið lýst sig sammála þeirri túlkun."

Hjálmar sagði í viðtali við Vísi í gær að það væri ekki rétt hjá Ríkisendurskoðun að það hefði verið misfarið með fé.

Þá sagði Hjálmar að honum fyndist Ríkisendurskoðun skilgreina full þröngt hvert féð ætti að fara. Spurður í hvað það fór sagði hann að það hefði meðal annars farið í almenna starfsemi svo sem námsráðgjafa og skrifstofu.

Þá sagði Hjálmar í viðtalinu að árlegur styrkur frá ríkinu, sem er 31 milljón á ári, rataði ekki í aðrar námsbrautir sem ekki eru styrktar af ríkinu. Nú segir Ríkisendurskoðun að þessi orð séu ekki sönn, heldur hafi féð sannarlega ratað í aðrar námsbrautir.

Hér fyrir neðan má lesa yfirlýsinguna í heild.