Lögreglan verður að gæta meðalhófs við fíkniefnaleit

„Lögregla hefur ákveðnar heimildir til leitar. Þarna reynir á hvort tiltekið ákvæði sakamálalaganna á við. Sé það svo verður að fara að meðalhófssjónarmiðum, í ljósi þess að um sé að ræða aðgerð sem felur í sér íhlutun í friðhelgi einstaklingsins.“ Þetta segir Þórður Sveinsson, lögfræðingur Persónuverndar.

Umboðsmaður Alþingis, Róbert R. Spanó, hefur óskað eftir tilteknum upplýsingum og skýringum frá lögreglunni á höfuðborgarsvæðinu vegna fíkniefnaleitar í Tækniskólanum í Reykjavík fyrir réttri viku.

„Ég óska þess að vera upplýstur um aðdraganda þess að leit var gerð í Tækniskólanum í Reykjavík 11. febrúar sl. og eftir nánari upplýsingum um það hvernig sú leit fór fram,“ segir í bréfi umboðsmanns.

„Óska ég þá meðal annars eftir upplýsingum um hvert hafi verið tilefni leitarinnar og hvaða gögn og upplýsingar lögreglan hafi lagt til grundvallar þegar tekin var ákvörðun um að leita í Tækniskólanum í Reykjavík umræddan dag. Hef ég jafnframt í huga hvort leitað hafi verið „á nemendum“ eins og kemur fram í einni af ofantilvitnaðri frétt, í skápum þeirra, skólatöskum o.þ.h.“

Þá óskar umboðsmaður eftir upplýsingum um á hvaða lagagrundvelli umrædd aðgerð byggðist á og þá meðal annars að virtri grundvallarreglu stjórnarskrárinnar um friðhelgi einkalífs. Hann vísar annars vegar til laga um meðferð sakamála í því tilliti og óskar eftir „…nánari rökstuðningi á því hvernig skólastofnun af því tagi, sem var vettvangur umræddrar aðgerðar, gæti talist „[húsakynni] sem [væru] opin almenningi eða hver og einn geti átölulaust gengið um“.

„Við munum upplýsa umboðsmann Alþingis um öll þau atriði sem hann spyr um,“ segir Stefán Eiríksson, lögreglustjóri á höfuðborgarsvæðinu, um málið. jss@frettabladid.is