Höfuðpaur fékk tæp fjögur ár

Fimm ungir menn hafa verið dæmdir í Héraðsdómi Reykjavíkur í samtals átta ára og fimm mánaða fangelsi fyrir að reyna að smygla til landsins um fjórum kílóum af amfetamíni, sem þeir höfðu falið í pakka í málningarfötum.

Höfuðpaurinn í málinu, Logi Már Hermannsson, sem skipulagði og fjármagnaði innflutning fíkniefnanna, var dæmdur í þriggja ára og níu mánaða fangelsi. Þorgrímur Kolbeinsson var dæmdur í tveggja ára fangelsi, Jón Sveinbjörn Jónsson var dæmdur í eins árs fangelsi og Þorsteinn Birgisson og Jóhann Páll Jóhannsson fengu tíu mánuði hvor.

Fíkniefnin fluttu mennirnir, sem eru frá tvítugu og upp í tæplega þrítugir að aldri, frá Danmörku á síðasta ári. Lögreglan í Danmörku hafði hins vegar náð pakkanum í millitíðinni og sett í hann gerviefni. Síðan var hann sendur hingað til lands.

Logi skipti verkum með hinum við að sækja fíkniefnin út og taka á móti þeim hér. Pakkinn var meðal annars geymdur um skeið í rjóðri í Mosfellsbæ. Þaðan var hann fluttur milli staða, þar til einn mannanna tók hann með sér heim til að afhenda Loga efnin. Maðurinn var handtekinn þegar hann var að opna pakkann.- jss