Tóku tæp þrjátíu kíló af fíkniefnum

„Sá góði árangur sem náðst hefur á Suðurnesjum við töku fíkniefna sem reynt hefur verið að smygla til landsins í gegnum Keflavíkurflugvöll byggist meðal annars á góðri samvinnu lögreglu og tollgæslu,“ segir Sigríður Björk Guðjónsdóttir, lögreglustjóri á Suðurnesjum.

Samtals 108 fíkniefnamál hófust hjá lögreglu en 59 mál hófust hjá tollinum. Mál sem koma upp í Leifsstöð eru nær undantekningarlaust á hendi tollgæslu, sem vísar þeim síðan til rannsóknar hjá lögreglu. Á síðasta ári var hald lagt á tæplega 23 kíló af fíkniefnum á Suðurnesjum, að sögn Sigríðar. Hlutur amfetamíns vó þar þyngst, því af því voru tekin um það bil tuttugu kíló. Af kókaíni voru tekin um tvö kíló, um 1.800 steratöflur, 6.000 e-töflur og um 660 kannabisplöntur.

Eitt tilvik kom upp þar sem Íslendingur var tekinn með heróín. Efnið var ekki ætlað til sölu heldur um svokallaðan neysluskammt að ræða.

Samtals voru 23 úrskurðaðir í gæsluvarðhald vegna fíkniefnamála og gæsluvarðhaldsdagar voru 404. Af 158 manna hóp voru 28 útlendingar. Fíkniefnasími lögreglunnar er 800 5005. Það er gjaldfrjálst og í það má koma nafnlausum upplýsingum um fíkniefnamál.- jss