Hreppsnefnd undrast ákvörðun Svandísar

4. febrúar 2010 09:30

Ísólfur Gylfi Pálmason, sveitarstjóri Hrunamannahrepps. Mynd/Valgarður Gíslason

Hreppsnefnd Hrunamannahrepps lýsir undrun sinni á ákvörðun Svandísar Svavarsdóttur, umhverfisráðherra, að synja staðfestingar á skipulagsbreytingum varðandi virkjanir í neðri Þjórsá þar sem þátttaka Landsvirkjunar í kostnaði sveitarfélaga við skipulagsvinnu stangist á við skipulags- og byggingarlög. Hreppsnefndin gagnrýnir jafnframt þann langa tíma sem ráðherra hafði málið til umfjöllunar.

Svandís greindi frá ákörðun sinni í síðastliðinn mánudag. Um tvær tillögur er að ræða. Annarsvegar breytingar á aðalskipulags Skeiða- og Gnúpverjahrepps og svo aðalskipulagi Flóahrepps fyrir árin 2006 til 2018. Ráðherra hafnaði alfarið að staðfesta fyrra skipulagið en samþykkti það síðara fyrir utan það sem snýr að virkjunum í Þjórsá.

„Hreppsnefnd Hrunamannahrepps lýsir jafnframt furðu sinni á þeim tíma sem ráðherra hefur tekið sér til umfjöllunar málsins. Að halda málinu innan ráðuneytis í allt að 14 mánuði áður en til úrskurðar komi kallar á að sett séu skýr lög hversu lengi ráðuneyti hafi til slíkrar umfjöllunar,“ segir í ályktun sem hreppsnefndin samþykkti á fundi sínum í gær.

Tengdar fréttir

Fagnaðarefni að hagsmunaaðilar geti ekki keypt sér skipulag

Samtökin Sól á Suðurlandi fagna úrskurði umhverfisráðherra um skipulag við Þjórsá, sem hefur í för með sér að þrjár fyrirhugaðar virkjanir Landsvirkjunar í Neðri-Þjórsá detta út af skipulagi.

2. febrúar 2010 17:25

Skipulagsbreytingum vegna neðri Þjórsár synjað staðfestingar

Umhverfisráðherra hefur synjað staðfestingar á skipulagsbreytingum varðandi virkjanir í neðri Þjórsá en í úrskurðum ráðuneytisins segir að þátttaka Landsvirkjunar í kostnaði sveitarfélaga við skipulagsvinnu stangist á við skipulags- og byggingarlög.

1. febrúar 2010 16:52

Samorka hraunar yfir umhverfisráðherra

„Ráðherrann hefur áður tafið þetta ferli með vísan í formsatriði er varðar auglýsingar á breyttu skipulagi. Getur hugsast að ráðherrann sé einfaldlega á móti því að farið verði í þessar framkvæmdir? Er ráðherrann þá e.t.v. vanhæfur þegar kemur að endurteknum úrskurðum um formsatriði í þessu máli?"

2. febrúar 2010 12:50

Hreppsnefnd sakar ráðherra um ærumeiðingar

Sveitarstjórn Skeiða- og Gnúpverjahrepps sakar Svandísi Svavarsdóttur umhverfisráðherra um ærumeiðandi og illa ígrunduð ummæli, byggð á óáreiðanlegum heimildum. Á hreppsnefndarfundi í félagsheimilinu Árnesi í gær var gerð sérstök bókun vegna þess rökstuðnings sem ráðherra færði fyrir ákvörðun sinni um að hafna því að staðfesta aðalskipulag hreppsins.

3. febrúar 2010 14:13

Segir afstöðu sína ekkert með ákvörðun um aðalskipulag að gera

Umhverfisráðherra segir að það hafi ekkert með afstöðu sína til virkjana fyrir stóriðju að gera, að aðalskipulagi tveggja hreppa sem liggja að Þjórsá var hafnað. Úrskurður ráðherrans setur virkjanaframkvæmdirnar í Neðri-Þjórsá í óvissu.

2. febrúar 2010 12:01

Landsvirkjun frestar viðræðum við fjölda fyrirtækja

Atvinnuuppbygging, sem nýtt hefði orku neðri Þjórsár, tefst um eitt til tvö ár vegna ákvörðunar umhverfisráðherra að hafna skipulagi Þjórsárvirkjana, segir forstjóri Landsvirkjunar. Hann segir fyrirtækið hafa verið í viðræðum við fjölda fyrirtækja en þeim verði öllum frestað núna.

3. febrúar 2010 18:38