Kjósa um sameiningu um helgina

Íbúar Hörgárbyggðar og Arnarneshrepps í Eyjafirði kjósa á laugardag um hvort sameina skuli sveitarfélögin tvö.

Alls búa 606 manns í sveitar­félögunum. Í Hörgárbyggð 429, en 177 í Arnarneshreppi.

Guðmundur Sigvaldason, bæjarstjóri í Hörgárbyggð, býst við því að sameiningin verði samþykkt: „Við teljum að með sameiningu verði hægt að efla samfélagið og auka möguleika þess til að takast á við ýmis stærri verkefni."

Sveitarfélögin tvö starfa nú þegar saman „um flesta hluti", að sögn Guðmundar, svo sem við rekstur skóla og íþróttamannvirkja.

„Þetta snýst því bara um að þróa það áfram," segir Guðmundur.

Fjárhagslega standi sveitar­félögin tvö ágætlega, en í yfirstandandi þrengingum efnahagslífsins sé betra að hafa borð fyrir báru.

„Tekjur sveitarfélaga almennt eru að minnka en um leið eru gerðar kröfur um sömu þjónustu. Þetta er fyrirbyggjandi aðgerð frekar en annað, til að geta brugðist betur við sveiflum þegar þær koma," segir sveitarstjórinn.

Beinn fjárhagslegur ávinningur af sameiningu sveitarfélaganna nemur um fjórtán milljónum króna á ári, þar af sex milljónir sem fást úr auknum framlögum Jöfnunarsjóðs sveitarfélaganna. Þá fást allt að 36 milljónir úr sama sjóði til að standa straum af kostnaði við sameininguna.

Samþykki íbúarnir sameiningar­áformin má gera ráð fyrir að þau gangi í gegn í kjölfar sveitarstjórnarkosninganna 29. maí. Í þeim kosningum yrði enn fremur kosið um nafn á sveitarfélagið nýja. - kóþ