Ungir framsóknarmenn á Austurlandi vilja hætta ESB viðræðum

Stjórn Eysteins - félags ungra framsóknarmanna á Austurlandi, skorar á ríkisstjórn Íslands að hætta aðildarviðræðum við Evrópusambandið og draga aðildarumsóknina til baka. Það er austfirski miðillinn Austurglugginn sem greinir frá þessu en félagið samþykkti ályktun þess efnis í gær. Þetta er þvert á nýlega ályktun Sambands ungra framsóknarmanna.

„Í henni segir að viðræðurnar séu ótímabærar og engar forsendur fyrir þeim. Aðild að sambandinu hafi mikil áhrif á sjávarútveg og landbúnað og þar af leiðandi landsbyggðina í heild sinni. Einnig er vísað til lítils vægis innan ESB vegna smæðar landsins," segir á Austurglugganum.

„Eins og fram hefur komið eru ekki miklar líkur á að einhverskonar sérsamningar náist fyrir Íslendinga frekar en fyrir aðrar þjóðir og þar af leiðandi eru allar forsendur er komu fram í ályktun Framsóknarflokksins um Evrópusambands aðild á síðasta flokksþingi brostnar," segir ennfremur.

Að lokum segir að stjórn félagsins hvetji þingmenn flokksins til að sýna samstöðu og einurð í andstöðu sinni við aðildarviðræður. Þá eru ungir framsóknarmenn hvattir til að einbeita sér að „þeim brýnu verkefnum sem krefjast úrlausnar á Íslandi í dag." Þetta er væntanlega sneið til aðalstjórnar Sambands ungra framsóknarmanna sem um daginn lýsti yfir ánægju sinni með að aðildarviðræðurnar væru í réttum farvegi.