Höfum gengið inn í hreinsunareldinn

„Við Íslendingar höfum gengið inn í hreinsunareldinn,“ sagði Katrín Júlíusdóttir iðnaðarráðherra á Iðnþingi Samtaka iðnaðarins í gær. „Við höfum þegar gripið til harkalegs niðurskurðar og hækkað skatta til þess að rétta við skuldir ríkissjóðs. Við höfum gert upp gömlu bankana í sátt við lánardrottna þeirra og komið þeim í starfhæft form. Við erum að gera upp við orsakir bankahrunsins á vettvangi Alþingis og dómstóla.“

Katrín kvað þjóðina nú eygja möguleika á að byrja upp á nýtt með hreint borð. „Aðrar þjóðir eru vart byrjaðar að gera upp sínar syndir þótt augljóst sé að það mun reynast óhjákvæmilegt.“

Iðnaðarráðherra áréttaði þó að endurreisn efnahagslífsins hér væri sérlega erfið því ekki væri einvörðungu við fjármálakreppu að fást heldur einnig alvarlega gjaldeyriskreppu sem haldið sé í skefjum með víðtækum höftum.

„Þessi „tvíburakreppa“ eins og Seðlabankinn kallar hana gerir viðbrögð stjórnvalda erfiðari,“ sagði hún og kvað afar mikilvægt að halda áfram að byggja upp traust á íslensku hagkerfi.

„Eins og var að takast á síðari hluta ársins sem leið, áður en Icesave-ferlið fór aftur í strand. Við eigum mikið undir því að áætlunin um endurreisn efnahagslífsins sem unnin var í samvinnu við AGS nái fram að ganga. Við verðum að geta fjármagnað uppbyggingu og endurfjármagnað lán opinberra aðila og orkufyrirtækja á kjörum sem ekki flytja arðinn úr landi.“

Katrín segir slæmar fréttir þær helstar að fjárfesting hér á landi hafi dregist saman um helming í fyrra og um 39 prósent á heimsvísu.

„Atvinnuleysi verður okkar helsta böl næstu misseri komi ekki til nýrra fjárfestinga. Góðu fréttirnar eru að það er rúm fyrir stórframkvæmdir í hagkerfinu á næstu misserum án þess að þær þurfi að ryðja burt sprotum og nýskapandi starfsemi.“

Helgi Magnússon, formaður Samtaka iðnaðarins, sagði í ræðu sinni eina ástæðu þess að illa gengi að endurreisa efnahag landsins að hér virtust áhrifamikil öfl á móti hagvexti.

„Þessi öfl beita afli sínu gegn endurreisn atvinnulífsins vegna þess að þau telja að hag landsmanna verði betur borgið í framtíðinni án hagvaxtar. Þessi átök standa nú yfir á Íslandi. En við aðhyllumst ekki þetta sjónarmið,“ sagði hann.

Helgi og Katrín sögðu að vegna nýliðunar á vinnumarkaði og í baráttu við atvinnuleysi þyrfti að búa til 35 þúsund störf næstu tíu ár. Til þyrfti samstillt átak og stefnumótun til framtíðar.

olikr@frettabladid.is