Hjálmar: Ég vissi betur en reynsluboltarnir

„Ég er nýr í pólitík en mér var reyndar sagt af reynsluboltum að ég ætti engan séns en ég vissi betur," segir Hjálmar Sveinsson, útvarpsmaður, sem er þessa stundina í fjórða sæti í prófkjöri Samfylkingarinnar í Reykjavík.

Hjálmar segir að það hafi fyrst og fremst verið skipulags- og skólamál og mikill áhugi á borgarsamfélaginu sem hafi dregið hann í stjórnmál.

„Ég hef mjög mikinn áhuga á því að það eigi sér stað ákveðin breyting á höfuðborgarsvæðinu. Það gengur ekki að hafa átta sveitarstjórnir og átta sveitarstjóra sem eru hver með sína stefnu í skipulagsmálum. Þessu verður að breyta því þetta hefur reynst okkur mjög dýrkeypt," segir Hjálmar.