Íslendingabarinn Jósef opnar í Austurríki

Íslendingar sem eru staddir í bænum Linz í Austurríki hafa opnað bar í miðborginni, við aðalgötuna, að sögn Ólafs Thordersen, sem að öllu jöfnu sinnir embætti bæjarfulltrúa í Reykjanesbæ. Tilefnið er að sjálfsögðu EM í handbolta sem hefst á morgun en von er á allt að 100 Íslendingum vegna mótsins.

Í tilefni mótsins hafa nokkrir Íslendingar náð samningi við kráareiganda um að breyta knæpunni í nokkurskonar Íslendingabar.

„Við erum bara að ganga frá þessu," sagði Ólafur en barinn heitir Jósef og verður kyrfilega merktur með íslenska fánanum. Að sögn Ólafs verður barinn tuttugu mínútum frá íþróttahöllinni og ætti að vera auðvelt að finna hann.

Sjálfur býst Ólafur við að 70-100 Íslendingar muni koma til Linz til þess að styðja við bakið á strákunum okkar. Fyrsti leikur íslenska landsliðsins verður á morgun en þá etja þeir kappi við Serbíu.