Mikel: Ancelotti öskraði á okkur á bæði ítölsku og ensku í hálfleik

John Obi Mikel, miðjumaður Chelsea, hefur lýst því hvernig Carlo Ancelotti tók leikmenn liðsins í gegn í hálfleik á bikarleik Chelsea og Cardiff um helgina. Staðan var 1-1 í leikhléinu en Chelsea vann síðan öruggan 4-1 sigur eftir hálfleiksræðuna.

„Þegar við komum til baka inn í búningsklefann þá var stjórinn okkar alveg brjálaður. Við vissum samt alveg hvað við áttum að gera í seinni hálfleiknum," sagði John Obi Mikel en hann játar að ræða Carlos hafi verið áhrifarík.

„Hann var mjög reiður út í okkur og öskraði á okkur á bæði ítölsku og ensku í hálfleik. Hann blandar nefnilega öllu saman þegar hann er reiður," segir Mikel og bætti við:

„Hann vissi að við gætum betur og við sýndum það strax í seinni hálfleiknum," sagði John Obi Mikel.