Villi og Andrea kósí saman

„Ég mátti velja mér listamann til að koma fram með og ég valdi Andreu Gylfadóttur, enda er hún í gríðarlegu uppáhaldi hjá mér,“ segir Vilhelm „Naglbítur“ Anton Jónsson. Villi og Andrea koma fram nú á miðvikudagskvöldið á fimmtu Fuglabúrs-tónleikum FTT og Reykjavík Grapevine.

„Við spilum bæði mín lög og hennar og svo teljum við í einhverja standarda. Mér finnst líklegt að við tökum Spiladósarlagið. Þetta er svo auðvelt með hennar stöff, það kunna allir Todmobile-lögin, bara nóg að hún kalli nafnið á laginu út í loftið. En það þarf að læra mitt stöff.“

Villi og Andrea koma fram með Birgi Bragasyni á kontrabassa og Hrafni Thoroddsen og Kjartani Valdimarssyni á píanó. „Þetta verður kósí og þægilegt, bara rauðvín og kerti. Engin tuddakeyrsla.“

Fyrir utan tónleikana eru Villi og Andrea bæði á fullu í leikhúsvinnu þessa dagana. „Hún er fyrir norðan, er tónlistarstjóri í Rocky Horror,“ segir Villi. „Ég er svo á fullu í Borgarleikhúsinu þar sem ég sé um músíkina í leikritinu Dúfurnar, sem verður frumsýnt 10. apríl. Þetta er mjög fyndið og súrt leikrit eftir Þjóðverja með eintómum stjörnuleikurum. Það var farin sú leið að spila þekkt lög. Siggi Sigurjóns syngur til dæmis Scooter-lag í einni senunni. Þetta verður helvíti töff.“

Tónleikar Villa og Andreu hefjast kl. 22 á morgun og eru haldnir á Café Rosenberg við Klapparstíg. Miðaverð er kr. 1.500. - drg