Handrukkarar dæmdir í 15 mánaða fangelsi

Héraðsdómur Reykjavíkur dæmdi Brynjar Loga Þórisson og Mikael Má Pálsson í 15 mánaða fangelsi í dag fyrir húsbrot, rán, eignaspjöll og tilraun til fjárkúgunar þegar þeir réðust inn á heimili manns í Reykjanesbæ í febrúar 2009. Þar ógnuðu þeir manninum með hníf og hótuðu honum stórfelldum líkamsmeiðingum yrði hann ekki við kröfum þeirra um peningagreiðslu vegna fíkniefnaskuldar hans.

Mennirnir þvinguðu fórnarlamb sitt, sem er á þrítugsaldri, í bifreið og óku til Reykjavíkur. Ennfremur létu þeir fórnarlambið hringja í fósturföður sinn sem þeir hótuðu sæi hann ekki til þess að fíkniefnaskuldin yrði greidd.

Mikael og Logi játuðu brot sín að hluta. Þeim var jafnframt gert að greiða fórnarlambi sínu 400 þúsund í bætur.