Skólastúlka í miklum vandræðum á skútu á Indlandshafi

Abby Sunderland sextán ára gömul skólastúlka frá Kaliforníu á í miklum vandræðum á skútu sinni eftir að hafa lent í óveðri á afskekktu svæði á Indlandshafi um 3000 kílómetra austur af Madagaskar. Skip eru á leið til hennar.

Abby er ein í hringferð um heiminn á skútu sinni. Í gærdag rofnaði símasamband foreldra hennar í gegnum gervihnött við skútuna og samhliða fóru báðir neyðarsendar skútunnar í gang. Foreldrar náðu aftur sambandi við dóttur sína í nótt en það var lélegt og rofnaði.

Ástralska strandgæslan samræmir björgunarðgerðir en næsta skip er í um 600 kílómetra fjarlægð og kemst ekki á staðinn fyrr en seinnipartinn í dag. Á meðan mun Qantas Airbus þota á vegum strandgæslunnar fljúga yfir staðinn og reyna að ná talstöðvarsambandi við Abby.

Samkvæmt nýrri frétt á CNN hefur áströlsku strandgæslunni nú tekist að ná talstöðvarsambadi við Abby.

Í bloggi sem foreldrar Abby halda úti um ferð hennar segir að Abby hafi allan búnað sem hugsast getur um borð til að lifa af og að þau voni hið besta. Í slitróttu símasambandi í nótt var að skilja á Abby að skúta hennar væri enn á réttum kili en töluvert löskuð eftir óveðrið.