Ástralir elska Vesturport

Hamskiptin, leiksýning Vesturports, var nýverið valin besta alþjóðlega leiksýningin á árinu sem var að líða af tveimur áströlskum blöðum.

Annars vegar The Week og hins vegar sunnudagsblaðinu The Herald Sun sem staðsett er í Sydney. Blöðin eru feykilega mikið lesin í Ástralíu og hefur hamingjusóskum hreinlega rignt yfir Gísla Örn Garðarsson frá andfætlingum að undanförnu. „Já, þetta virðist hafa vakið mikla athygli og við getum ekki annað en verið glöð yfir viðtökunum,“ segir Gísli Örn en hann er að undirbúa frumsýningu Fást sem verður í Borgarleikhúsinu á föstudaginn. Gísli hlær þegar hann er inntur eftir því vinskapur Vesturports og Nick Cave, óskabarni áströlsku þjðóðarinnar, hafi ekki leikið stórt hlutverk í þessum miklu vinsældum. „Jú,jú það hlýtur að vera,“ segir hann.

Annars stefnir í að Hamskiptin nái því að verða sýnd í flestöllum byggðum heimsálfum því fyrirhugaðar eru leikferðir til New York og Kólumbíu á þessu ári. Evrópa, Asía, Eyjaálfa verða þá að baki en eflaust er vonlaust að setja upp sýninguna á Suðurskautslandinu. „Við eigum þá bara eftir Afríku, það yrði kannski bara gaman að koma þangað og setja verkið upp þar“ segir Gísli. Þá hafa tekist samningar við Borgarleikhúsið í Malmö um kaup á leikgerðinni sjálfri að Hamskiptunum. „Þetta gæti alveg orðið smá iðnaður, að selja þessa leikgerð til annarra leikhúsa og yrði bara skemmtilegt ef afurðin fengi sjálfstætt líf.“ -fgg