Ian Rush: Liverpool verður að hætta að treysta svona mikið á Torres

Ian Rush, hinn kunni markaskorari Liverpool á árum áður, segir að Liverpool-liðið verði að fara getað spilað án spænska framherjans Fernando Torres. Torres hefur verið mikið meiddur á þessu tímabili og Liverpool-liðið hefur ekki verið sannfærandi án hans.

„Það er meira að segja pressa á að hann spili þó að hann sé meiddur," sagði Ian Rush við staðarblaðið Liverpool Echo.

„Menn eru augljóslega að reyna að passa upp á hann og reyna að spara hann þannig að hann geti klárað tímabilið með liðinu. Kannski hélt Rafa Benitez að Liverpool væri með nóu gott lið til þess að vinna Fulham án hans," sagði Rush en Torres glímir nú við hnémeiðsli sem héldu honum frá í upphafi ársins.

„Það er á svona tímapunktum þegar liðið þarf á góðum leikmannahópi að halda, til að komast í gegnum svona leiki. Liverpool verður að hætta að treysta svona mikið á Torres. Við megum ekki koma okkur í þá aðstöðu að liðið hætti að vinna leiki þegar Torrres getur ekki spilað," sagði Rush.

„Liverpool verður bara að fjárfesta í leikmannahópi sem getur klárað leiki þótt að einhverjir af stjörnuleikmönnum liðsins geti ekki verið með," sagði Rush.