Nokkur ár tekur að hreinsa til eftir olíulekann á Mexíkóflóa

Thad Allen yfirmaður bandarísku strandgæslunnar segir að það muni taka nokkur ár að hreinsa upp eftir olíulekann á Mexíkóflóa.

BP hefur náð nokkrum árangri í að hefta lekann og dælir nú upp 11.000 tunnum af olíu á dag úr leiðslunni sem lekur. Þetta dugir þó hvergi nærri til og sýna neðanjarðarmyndavélar að enn lekur töluvert af olíu út í flóann, að því er segir í frétt á BBC.

Allen segir að BP sé nú að koma öðrum olíuborpalli fyrir við holuna sem lekur úr en sá borpallur er sérhannaður til vinnslu í slæmu veðri. Ástæðan fyrir þessari aðgerð er að fellibyljatímabilið er hafið á Karabíska hafinu í grennd við Mexíkóflóann.