Ætla að brenna Kóraninn þann ellefta september

Evangelísk kirkja í Flórída heitir því að brenna Kóraninn, höfuðrit Múhameðstrúar, þann 11. september næstkomandi. Þá verða níu ár liðin frá því að ráðist var á Tvíburaturnana í New York og varnarmálaráðuneytið í Pentagon með þeim afleiðingum að þúsundir fórust.

Talsmenn Hvíta hússins hafa töluverðar áhyggjur af þessum fyrirætlunum. Þar á bæ óttast menn að þetta geti stefnt hermönnum í Afganistan í voða og alið á fyrirlitningu í garð múslima í Bandaríkjunum.

„Öll hegðun af þessu tagi, sem myndi stefna hermönnum okkar í hættu, væri mikið áhyggjuefni fyrir þessa ríkisstjórn," er haft eftir Robert Gibbs, talsmanni Hvíta hússins, á The Sidney Morning Herald.