Handtökur vegna öryggis páfa í Bretlandi

Scotland Yard hefur handtekið fimm menn sem taldir voru ógna öryggi Benedikts páfa. Páfinn er í opinberri heimsókn í Bretlandi.

Mennirnir fimm eru sagðir vera frá Alsír. Sky fréttastofan segir að vopnaðir lögreglumenn hafi ráðist til inngöngu í fyrirtæki í miðborg Lundúna í morgun og handtekið mennina.

Þeir eru á aldrinum 25-50 ára. Þeim er haldið í krafti hryðjuverkalaga sem sett voru árið 2000.

Lögreglan segir að engin ástæða sé til þess að breyta dagskrá páfans. Farið hafi verið yfir öryggisatriði eftir handtökuna og þau þyki í lagi.