Þjófar réðust á bíleigenda

Bíleigandi í Grafarvogi telur sig hafa átt fótum fjör að launa þegar hann ætlaði að handsama mann, sem hafði brotið rúðu í bíl hans í nótt, þegar samverkamaður þjófsins kom æðandi með brugðinn lurk og hugðist lumbra á bíleigandanum.

Upphaflega vaknaði bíleigandinn við þjófavanakerfi bílsins og sá þá þrjá menn hlaupa frá honum eftir að hafa brotið rúðu í honum. Skömmu síðar sá hann tvo menn aftur komna að bílnum, hljóp þá út og gómaði annan, en þá kom hinn til hjálpar, eins og áður sagði, og bíleigandinn forðaði sér. Að sögn hans töluðu  mennirnir saman á erlendu tungumáli, sem hann þekkir ekki til.