Eldur kveiktur í stórri stæðu af vörubrettum

Eldur var kveiktur í stórri stæðu af vörubrettum, sem stóð við vegg iðnaðarhúsnæðis við Mjölnisholt í Reykjavík um klukkan hálf fjögur í nótt og lagði mikinn reyk frá eldhafinu, þegar slökkvilið kom á vettvang. Margar tilkynningar bárust um eldinn, enda sást bjarminn víða að.

Húsveggurinn er steyptur og gluggalaus, og hafði eldurinn ekki náð í þakskeggið, þegar slökkvilið bar að og slökkti eldinn. Augljóst þykir að kveikt hafi verið í stæðunni og hefði eldurinn hæglega getað farið úr böndunum.

Laust fyrir miðnætti var líka kveikt í ruslagámi í austurborginni, og er þetta þriðja íkveikjan í ruslagámi á þeim slóðum, þriðju nóttina í röð. Lögregla telur líklegt að sami brennuvargur hafi verið þar að verki og hafi hann jafnframt kveikt í brettastæðunni. Málin eru litin alvarlegum augum og leggur lögreglan mikla áherslu á að upplýsa þau.-