Skotar æfir yfir auglýsingu sem var framleidd á Íslandi

Tryggingarisinn Scottish Widows tók upp auglýsingu hér á Íslandi síðasta sumar en Skotar eru allt annað en ánægðir með framtakið samkvæmt fréttasíðu The Sun.

Tryggingafyrirtækið, sem er staðsett í Edinborg, tók auglýsinguna upp í svipuðu landslagi og finna má í Skotlandi. Skotar eru heldur svekktir yfir því að þeir tóku ekki auglýsinguna upp í Skotlandi og þannig skapað atvinnu fyrir kvikmyndaiðnaðinn þar í landi. Tryggingarisinn heldur því fram að það hafi verið of dimmt í Skotlandi til þess að taka upp auglýsinguna.

Skoskir kvikmyndagerðamenn benda á það augljósa og segja auglýsinguna sennilega kosta morðfjár þar sem flytja þurfti fólk og búnað til Íslands.

Kvikmyndagerðamaðurinn Belle Doyle sagði hneykslaður í viðtali við The Sun: „Við erum steinhissa. Með fyrsta flokks starfsfólki, frábæru landslagi og hátæknilegri aðstöðu fyrir kvikmyndagerðamennina hefði Skotland eðlilega átt að verða fyrir valinu. Skotland var nógu gott fyrir Harry Potter."

Talsmaður Scottish Widow benti þá á að finna mætti fjölbreyttara landslag á færri ferkílómetrum á Íslandi en í Skotlandi, það hefði sparað talsverðan pening.

Þá bætti hann við að á sumrin væri birta allan sólarhringinn hér á landi, sem gerði það að verkum að hægt væri að taka meira upp af auglýsingunni og því eyða minni tíma í framleiðslu hennar, sem aftur sparaði pening.