Paul Rames og fjölskylda fengu dvalarleyfi

Paul Ramses og hans fjölskylda voru himinlifandi yfir því að fá loks afgreiðslu sinna mála eftir tæplega tveggja ára bið en Útlendingastofnun veitti þeim í dag dvalarleyfi á grundvelli verndar gegn ofsóknum í heimalandi þeirra. Þau segja þungu fargi af sér létt við niðurstöðuna og eru þakklát fyrir að geta nú lifað eðlilegu lífi á Íslandi.

Barátta Paul Ramses og fjölskyldu hans við íslensk útlendingayfirvöld fór ekki framhjá almenningi. Honum var vísað úr landi og fluttur til Rómar í júlí fyrir tveimur árum og konan hans Rosemary var skilin eftir á Íslandi með nýfæddan son þeirra Fídel Smára. Íslendingar mótmæltu brottvísuninni harðlega. Með hjálp Katrínar Theodórsdóttur lögmanns þeirra og stuðningsmanna fékk hann að snúa aftur til Íslands. En svo tók við tæplega tveggja ára bið sem lauk í dag þegar Útlendingastofnun veitti honum og fjölskyldu hans dvalarleyfi.

Paul segir að þessi tími hafi verið afar erfiður fyrir sig. Hann finni nú frið og geti hugsað um morgundaginn.

Paul var synjað um pólitískt hæli en fékk dvalarleyfi á grundvelli verndar gegn ofsóknum í hans heimalandi. Ekki má samkvæmt lögum senda útlending til svæðis þar sem hann hefur ástæðu til að óttast ofsóknir sem á við hans tilfelli.

Bæði eru þau í fullu starfi, Paul starfar í eldhúsi á veitingastað og hún sem gengilbeina á hóteli. Þau eiga von á sínu öðru barni eftir fimm mánuði.

„Við viljum vera hér til dauðadags. Við lítum á Ísland sem heimaland okkar," segir Rosemary Atieno Odhiambo, eiginkona Paul Ramses.