Ætla að skera niður um 24 milljarða evra

Ítalska ríkisstjórnin hefur samþykkt 24 milljarða evra niðurskurð fyrir næsta ár og þarnæsta til að fást við fjárlagahallann. Upphæðin samsvarar 3800 milljörðum íslenskra króna.

Í niðurskurðartillögunum felst að draga úr launakostnaði í opinberum rekstri og draga úr nýráðningum opinberra starfsmanna. Jafnframt er gert ráð fyrir að minna verði greitt úr lífeyrissjóðum opinberra starfsmanna. Þá mun verða skorið niður í rekstri sveitastjórna. Niðurskurðurinn nemur 1,6% af vergri landsframleiðslu.

Ítalía er síður en svo fyrsta ríkið í Evrópu sem greinir frá niðurskurðaráætlunum i því efnahagsóveðri sem er skollið á í heimsálfunni. Grikkland, Spánn og Portúgal hafa gripið til svipaðra úrræða og Ítalía. Þá tilkynntu Bretland og Danmörk um niðurskurðaráætlanir fyrr í vikunni.

Opinberir starfsmenn á Ítalíu hafa þegar gripið til mótmæla gegn þessum niðurskurðaráformum. Þeir fullyrða að hið opinbera hafi þegar þurft að líða fyrir kreppuna og ekki sé hægt að ganga lengra í þessa átt. Stjórnvöldum væri nær að taka harðar á undanskotum frá skatti.