Reynsluflug Airbus sýndi ekkert óeðlilegt

Flugvélaframleiðandinn Airbus nýtti sér í gær áætlað reynsluflug til þess að meta áhrifin sem aska frá Eyjafjallajökli hefur á flugvélar sem fljúga yfir Evrópu.

Í tilkynningu frá Airbus segir að tvær flugvélar hafi farið í loftið frá Toulouse flugvelli klukkan 14.25 og 14.50 að frönskum tíma. „Á meðan á flugi stóð fylgdust áhafnir með hegðun flugvélanna og hreyflanna. Flugvélarnar voru einnig skoðaðar ýtarlega eftir að þær lentu aftur. Áhafnirnar tóku ekki eftir neinu óeðlilegu á meðan á flugi stóð og skoðun á vélunum eftir að þær lentu gaf ekki neitt óeðlilegt til kynna."

Airbus segir að niðurstöðurnar hafi verið sendar framleiðendum hreyflanna og flugmálayfirvöldum til þess að aðstoða við að meta aðstæður til öruggs flugs.

„Flugvélarnar sem flogið var í þessu reynsluflugi eru Airbus A 380 MSN 4, knúin fjórum EA hreyflum og Airbus A340-600 MSN 360 knúin Rolls Royce hreyflum. A 380 vélin flaug í þrjár klukkustundir og 50 mínútur innan franskrar lofthelgi og A340 flugvélin flaug í fimm klukkustundir innan franskrar og þýskrar lofthelgi."