Um 80 þúsund tóku strætó

Um 80.000 farþegar tóku strætó á Menningarnótt, sem er með því mesta sem almenningssamgöngur á höfuðborgarsvæðinu hafa flutt á einum degi frá upphafi.

Sérstakt átak var gert að þessu sinni til að hvetja almenning til að taka strætó og var m.a. boðið frítt í strætó allan daginn og ferðum fjölgað. Margir svöruðu kallinu og nýttu sér strætó til að ferðast til og frá miðbænum, sem þýddi að álag var minna á götur og bílastæði borgarinnar.

Í tilkynningu frá stjórnendum Strætós segir að akstur strætó um daginn og kvöldið hafi gengið mjög vel og þakka þeir almenningi fyrir samveruna og samfylgdina á meðan á Menningarnótt stóð.