Gylfi: Atvinnurekendur of svartsýnir

Efnahags- og viðskiptaráðherra segir að atvinnurekendur séu of svartsýnir á þróun efnahagsmála á þessu ári. Efnahagur landsins þróist til betri vegar verði Icesave deilan leidd til lykta og samstarfið við Alþjóðagjaldeyrissjóðinn haldi.

43% stjórnenda í stærstu fyrirtækjum landsins telja að aðstæður í efnahagslífinu eigi eftir versna á næstu sex mánuðum. Þetta er niðurstaða könnunar sem Capacent Gallup gerði á stöðu og horfum í efnahagslífinu meðal 400 stærstu fyrirtækja landsins. Könnunin var gerð í desember en niðurstöður voru birtar í síðustu viku.

Aðeins 18% stjórnenda telja að aðstæður eigi eftir lagast.

Gylfi Magnússon, efnahags- og viðskiptaráðherra, telur að stjórnendur séu of svartsýnir. „Sjálfur er ég eitthvað bjartsýnni auðvitað með þeim fyrirvörum að við löndum þessu Icesave máli og höldum áfram samstarfi við Alþjóðagjaldeyrissjóðinn. Ef það gengur eftir sé ég ekki neina ástæðu til þess að vera með neina dómsdagsspá fyrir árið," segir Gylfi.

Að mati Gylfa bendir margt til þess að ástandið eigi eftir lagast þegar líða tekur á árið og jafnvel megi búast við hagvexti á þriðja ársfjórðungi.

„Við gerðum ráð fyrir því, og ekki bara við heldur aðilar eins og OECD, Alþjóðagjaldeyrissjóðurinn og fleiri, að það næðist einhver hagvöxtur þegar líða fer á árið. Jafnframt að draga fari úr atvinnuleysi og fleira færist til betri vegar. Þótt það sé veruleg óvissa núna út af atburðum síðustu vikna þá ætla ég rétt að vona - og hef reyndar enga ástæðu til að ætla annað en að það gangi eftir að ef við náum leysum þennan vanda sem nú er kominn upp þá nái þessar áætlanir að ganga nokkurn veginn eftir. Þannig að ég sé enga ástæðu til að vera með alltof mikla svartsýni," segir Gylfi.