Allt með kyrrum kjörum á gosstöðvunum

Umferð í kringum gosstöðvarnar á Fimmvörðuhálsi hefur verið með rólegra móti í dag, miðað við undanfarna daga, samkvæmt upplýsingum frá lögreglu og björgunarsveitum í Rangárþingi, og hafa engin óhöpp komið upp.

Straumur fólks og bíla inn í nærsveitir Eyjafjallajökuls hefur þó verið að aukast síðdegis, en jafnan sést best til gosstöðvanna í ljósaskiptum. Mjög gott veður er í Þórsmörk, og þokkalegt uppi á Fimmvörðuhálsi og sést því ágætlega til gossins úr Fljótshlíð. Hins vegar hefur verið skafrenningur á Mýrdalsjökli og þungt færi og aðeins fyrir mikið breytta bíla.

Á Sólheimaheiði hefur þeim verið snúið við sem ekki eru á nægilega vel búnir. Vakt er einnig við gönguleiðina upp frá Skógum þar sem vanbúnir göngumenn eru stöðvaðir. Það kom þó ekki í veg fyrir að björgunarsveitir þurftu fyrr í dag að hjálpa tveimur illa búnum göngumönnum niður til byggða ofan af Fimmvörðuhálsi.

Veðurstofan segir að krafturinn í gosinu sé sá sami. Gosóri sé óbreyttur en inn á milli komi hviður, sem stafi líklega af því að hraunið kemst enn í tæri við snjó en við það verða gufusprengingar. Fáeinir jarðskjálftar hafa orðið undir austurhluta Eyjafjallajökuls en allir innan við 2 að stærð.

GPS-mælar á svæðinu sýna litlar breytingar á útþenslu fjallsins, sem bendir til að kvika streymi enn af fullum krafti til gíganna.