Ætlar að berjast fyrir reglum um kattahald

„Nú er bara að bretta upp ermarnar og keyra þetta mál í gegn," segir Guðríður Arnardóttir, oddviti Samfylkingarinnar í Kópavogi. Guðríður hefur í mörg ár barist fyrir reglum um kattahald í bænum og segir nú vera tíma til aðgerða.

"Kópavogur er eina sveitarfélagið sem hefur ekki sett reglur um kattahald," segir Guðríður. „Ég hef lengi barist fyrir reglum um kattahald í bænum, nú er tekinn við nýr meirihluti og því aðstaða til að koma þessum reglum í gegn."

Guðríður segir það felast í reglunum að kattaeigundur þyrftu tvisar á ári að koma með ketti í skoðun og þeir þurfi að fá ormalyf og vera skráðir. Þá eigi lausaganga einnig að vera takmörkuð og kattaeigendum gerð skylda að hengja bjöllu á kettina.

„Ástæðan fyrir takmörkunum á lausagöngu er sú að það er mikið fuglalíf á Kársnesinu og það eru dæmi um að kettirnir ráðist á smáfuglana."

Guðríður segir þau tvö dæmi um ágang villikatta sem Vísir hefur fjallað um sýna þörfina á samræmdum reglum um kattahald.

„Ég vona að það verði pólitísk samstaða um þetta mál. Nú er bara að bretta upp ermar og keyra þetta mál í gegn. Ég mun hefja vinnu við það strax eftir helgi."