Undrast yfirlýsingar meirihluta stjórnar VR

Stjórn Nýs Íslands lýsir yfir furðu sinni með yfirlýsingu meirihluta stjórnar VR sem birtist á heimasíðu félagsins í dag.

Stjórnin segir að VR geri atlögu að tjáningarfrelsi, skoðunum og stefnu sem samtökin Nýtt Ísland fari fyrir. Meirihluti stjórnar VR sendi frá sér ályktun í dag þar sem þeir segjast harma að nokkrir stjórnarmenn í félaginu tengist samtökunum Nýtt Ísland. Samtökin beini kröftum sínum að því að brjóta VR niður.

Stjórn Nýs Íslands segir hins vegar að það sé athyglisvert að stærsta verkalýðsfélag landsins einbeiti sér að samtökunum Nýja Íslandi í stað þess að koma skuldsettum heimilum landsins til hjálpar og þrýsta á stjórnvöld um raunverulegar aðgerðir t.d. fyrir atvinnulausa og þá sem ekki eigi til hnífs og skeiðar.

Þá lýsir stjórn Nýs Íslands furðu sinni á hátterni meirihluta stjórnar og formanns VR á ASÍ þingi þar sem vínbarinn hafi verið opinn fyrir stjórn VR þeim að kostnaðarlausu. Á meðan brenni upp eignir landsmanna og atvinnulausum fjölgi.