Carlo Ancelotti: Ashley Cole mun spila á HM í sumar

Carlo Ancelotti, stjóri Chelsea, er viss um að Ashley Cole verði orðinn góður af ökklabroti sínu fyrir HM í Suður-Afríku í sumar en Cole meiddist á móti Everton í vikunni og verður frá í þrjá mánuði.

Cole fór í aðgerðina í dag og verður í gipsi í heilan mánuð. Hann ætti að gera náð síðustu leikjum Chelsea á tímabilinu og getur væntanlega spilað með enska landsliðinu í æfingaleikjum enska landsliðsins á móti Mexíkó og Japan í lok maímánaðar.

„Ég vona að hann ná sér sem fyrst og verði kominn til baka fyrir lok tímabilsins. Það er alveg raunhæf bjartsýni," sagði Carlo Ancelotti og bætti við: „Hann verður farinn að spila aftur eftir þrjá mánuði og hann verður örugglega með Englendingum á HM," sagði Ancelotti.

„Þegar leikmaður meiðist svona illa þá er hann að sjálfsögðu langt niðri andlega. Ég þekki það af eigin raun en maður þarf að komast í gegnum depurðina sem fyrst og fara að horfa fram á veginn. Ashley hefur rétta andann og ég er viss um að hann kemur til baka á undan áætlun. Hann mun gera allt til að ná sér sem fyrst," sagði Ancelotti.