Atkvæðagreiðsla um kjarasamning hafin

Atkvæðagreiðsla um nýgerðan kjarasamning milli Landssambands slökkviliðs- og sjúkraflutningamanna og Launanefndar sveitafélaga hófst í dag. Hún mun standa til næsta mánudags. Gögn um samninginn voru send trúnaðarmönnum í gær í tölvupósti. Slökkviliðs- og sjúkraflutningamenn höfðu starfað samningslausir í um eitt ár áður en samningar tókust við Launanefnd sveitarfélaga á föstudaginn.

Sverrir Björn Björnsson, formaður Landssambands slökkviliðs- og sjúkraflutningamanna, sagði þá að það væri félagsmanna að meta hvort samkomulagið sem landssambandið og Launanefnd sveitarfélaga undirrituðu væri gott.