Grunur um salmonellu í kjúklingi

Komið hefur upp grunur um salmonellusmit í ferskum kjúklingi framleiddum af Matfugli. Frekari rannsókna er þörf til þess að staðfesta gruninn en þangað til þykir fyrirtækinu rétt að innkalla vöruna. Í samræmi við innra eftirlit fyrirtækisins og í samráði við heilbrigðisyfirvöld hefur verið unnið að innköllun vörunar, að fram kemur í tilkynningu frá fyrirtækinu.

Stutt er síðan grunur kom upp um samskonar smit í kjúklingum frá sama fyrirtæki.

Um er að ræða kjúkling með rekjanleikanúmerinu (Rlnr.) 011-10-09-3-34. Dreifing á vörunni hefur verið stöðvuð. Kjúklingur með öðru rekjanleikanúmeri en þessu er í lagi, að mati Matfugls.

Hafi fólk ferska kjúklinga heima hjá sér er það beðið um að gæta að rekjanleikanúmerinu, sem er að finna á umbúðunum, og skila kjúklingnum í viðkomandi verslun eða beint til Matfugls ehf., Völuteigi 2, Mosfellsbæ.