Undirrituðu samkomulag um Landsmót hestamanna

Hestamannafélagið Fákur og Landssamband hestamannafélaga undirrituðu í dag samstarfssamning um að Landsmót hestamanna árið 2012 verði haldið á félagssvæði Hestamannafélagsins Fáks í Reykjavík.  

Landsmót eru haldin á tveggja ára fresti og verður landsmót haldið  í Reykjavík dagana 24. júni til 1. júlí 2012 á 90 ára afmæli Hestamannafélagsins Fáks.

Landsmót draga að sér mikinn fjölda innlendra sem erlendra gesta og á síðasta Landsmóti voru um 14 þúsund gestir og 1100 hross skráð til leiks svo það má búast við mikilli hátíð, að fram kemur í tilkynningu. Þar segir jafnframt að ætla megi að tíundi hver Íslendingur stundi hestamennsku með reglubundnum hætti og fimmti hver erlendur ferðamaður sem komi til landsins fari á hestbak.